औरंगाबाद : खासदार इम्तियाज जलील यांनी नाव न घेता बेगमपुरा भागात काँग्रेसचे नगरसेवक पत्त्याचा क्लब चालवीत असल्याचा आरोप केला होता. या आरोपाला नगरसेवक अफसरखान यांनी उघड-उघड आव्हान दिले आहे. तुम्हाला जनतेने निवडून दिले आहे, विकासकामे करा. शहानिशा न करता बिनबुडाचे आरोप करून बदनामी करू नका, अन्यथा मानहानीचा दावा करेन, मी सक्षम आहे, अशा शब्दात अफसरखान यांनी खा. इम्तियाज जलील यांना आव्हान दिले आहे.

औरंगाबादचे नवनिर्वाचित खासदार इम्तियाज जलील यांनी सोमवारी पत्रकार परिषद घेत बेगमपुरा भागातील काँग्रेस पक्षाचे नगरसेवक अफसर खान यांचे नाव न घेता, ते पत्त्याचा क्लब चालवीत असल्याचा आरोप केला होता. जुगार अड्डा बंद न झाल्यास उपोषण करण्याचा इशाराही त्यांनी दिला होता. त्यानंतर सोमवारी रात्री नगरसेवक अफसर खान यांनी एक व्हिडीओ प्रसारित केला आहे. या व्हिडीओमध्ये खासदार जलील हे पत्रकार असताना त्यांनी ब्लॅकमेलिंग केल्याचा आरोप करण्यात आला आहे. त्यांनी आमदार असताना जे जे विषय उपस्थित केले आहेत त्या विषयात सेटलमेंट झाली आहे. कोणतीही शहानिशा न करता खासदार जलील हेमाझ्यावर आरोप करीत आहेत. प्रथम सत्यता पडताळून पहा, नंतर आरोप करा. समाजात माझी बदनामी करू नका, अन्यथा  मानहानीचा दावा ठोकेन. मी एमआयएम पक्षाचे काम केले नाही, मी माझ्या पक्षाशी एकनिष्ठ आहे. माझ्या पक्षाचे काम केले म्हणून माझ्यावर जलील सूड उगवत आहेत. पोलिसांवर दबाब टाकून माझ्यावर कारवाई करण्यास भाग पाडत आहेत. मी मागील 25 वर्षांपासून राजकारणात आहे. मी तीन वेळा मनपा विरोधी पक्षनेता होतो. जलील हे आताच राजकारणात आले आहेत. खासदार झाले म्हणजे पंख लागले का? तू काय माझ्याकडे येतो? तू सांग कुठे येऊ? लढण्याची भाषा करू नको. लढण्यासाठी मी सक्षम आहे, अशा एकेरी शब्दात खासदार जलील यांना काँग्रेसचे नगरसेवक अफसर खान यांनी खुले आव्हान दिले आहे. मतदारांनी विकासकामे करण्यासाठी निवडून दिले आहे. आधी विकासाकडे लक्ष द्या. समाजात बदनामी करू नका, अन्यथा मलाही संविधानाने अधिकार दिले आहेत. केलेले आरोप सिद्ध करून दाखवा, असे आव्हान नगरसेवक अफसर खान यांनी खा.जलील यांना दिले आहे.